አጥቢያ ዶት ኮም “ቴክኖሎጂ ለቤተክርስቲያን” በሚል መሪ ቃል ልዩ ልዩ የቴክኖሎጂ ስራዎችን እያበረከተ ይገኛል። የአገልግሎቱን ተደራሽነት ለማሳደግ ያግዝ ዘንድ “Atbiya App – አጥቢያ” የተባለ የአንድሮይድ መተግበሪያን በማዘጋጀት በጉግል ፕሌይ ስቶር ላይ ለተጠቃሚዎች የተለቀቀ ሲሆን የመተግበሪያው የመነሻ ይዘቶች፡
– ግጻዌ፦ ቀን መቁጠሪያ እና የእለት ምንባባት
– ወቅታዊ ይዘቶች፦ በቤተክርስቲያናችን ልዩ ልዩ ይፋዊ ድረገጾች የሚለቀቁ ወቅታዊ ይዘቶች
– የጸሎት መጻሕፍት

በተጠቃሚዎች አስተያየት እና ጥቆማ ለወደፊት ተጨማሪ ይዘቶች እንደሚለቀቁ ታውቋል። የአንድሮይድ መተግበሪያውን ከዚህ በታች ባለው አድራሻ ማግኘት ይቻላል።
https://play.google.com/store/apps/details?id=com.atbiya.atbiya

በአጥቢያ ዶት ኮም ትብብር የተዘጋጀው የሕጻናት እና አዳጊዎች ክፍል ውስጣዊ አሠራር መመሪያ በሰንበት ት/ቤቱ ሥራ አመራር ጸድቆ የሙከራ ትግበራ ለማስጀመር ዝግጅት እንደተጀመረ ተገለጸ። የመመሪያ ዝግጅቱ በሕጻናት እና አዳጊዎች አገልግሎት ሱታፌ ያላቸው ልዩ ልዩ ባለድርሻ አካላትን ያሳተፈ ሲሆን በዋናነት ከወላጆች መረጃዎችን በመጠይቅ እንዲሰበሰብ መደረጉ ታውቋል።

የተዘጋጀው መመሪያ በሙከራ የትግበራ ጊዜው የሚገኙ ልምድ እና ግብአቶችን በማካተት የሚሻል ሲሆን በቀጣይም ከሰንበት ት/ቤቱ የሌሎች ክፍሎች አሠራር መመሪያዎች ጋር እየተናበበ እንደሚተገበር ታውቋል።

በመመሪያው ዝግጅት የተሳተፉትን ሁሉ ከአጥቢያ ዶት ኮም እንኳን ደስ አላችሁ የሚል መልእክታችንን እናስተላልፋለን።

በአጥቢያ ዶት ኮም ፕሮጀክት ተቋራጭነት የተሰራው የዚህ አመት (2016) የግቢ ጉባኤያት ተመራቂዎች ዲጅታል መጽሔት ስራ ከታቀደለት የጊዜ ሰሌዳ አስቀድሞ ትናንት ሰኔ 23 ቀን 2016 ዓ.ም.  የተጠናቀቀ ሲሆን የዲጅታል የምረቃ መጽሔቱ ለተመራቂዎች በስርጭት ላይ ይገኛል። የአመቱን የተመራቂዎች ዲጅታል መጽሔት በማስመልከት የግቢ ጉባኤያት ማስተባበሪያው የማስተዋወቂያ መርሐግብር እንደሚያዘጋጅ ታውቋል።

አጥቢያ ዶት ኮም ለፕሮጀክቱ መሳካት አስተዋጽዖ ያደረጉ የግቢ ጉባኤያት አገልግሎት አስተባባሪዎች (በሁሉም እርከን ላይ የሚገኙ) ከፍ ያለ ምስጋናን ያቀርባል።

ለሰባት ተከታታይ ሳምንታት በበይነ መረብ የተሰጠው የውጤታማ ሥራ አመራር ስልጠና በትናንትናው እለት ተጠናቅቋል። በስልጠናው የተለያዩ መሰረታዊ ጉዳዮች የተዳሰሱ ሲሆን ስልጠናው በገለጻ፣ ውይይት እና ተግባራዊ እንቅስቃሴ የተደገፈ እንደነበር ታውቋል። የተሸፈኑት ዋና ዋና አርእስት፦ የኢ/ኦ/ተ/ቤ፣ ባህል እና የለውጥ አመራር፣ ባህል እና የለውጥ አመራር፣ ውጤታማ ተግባቦት፣ ውጤታማ ስብሰባ፣ በእቅድ መመራት እና የአሰራር መመሪያ ዝግጅት እንደሆኑ ታውቋል።

በመርሐግብሩ ማጠቃለያ ላይ የደብሩ አስተዳዳሪ ሊቀትጉኃን ቀሲስ ብርሃኑ ደሳለኝ ይህ የሰበካ አስተዳደር ጉባኤ እድለኛ ነው። ውጤታማ ሥራን ለመስራት እና የበለጠ ለማገልገል የሚረዱ ክህሎቶችን ያስተዋወቀ ስልጠና አግኝቷል ብለዋል። እንዲሁም ለመርሐግብሩ ዝግጅት ቁልፍ የማስተባበር ስራን የሰሩት ቀሲስ ተመስገን ቅጣው ሰልጣኞች በስልጠናው ያገኟቸውን እውቀቶች በስራ ለመተግበር ሶስት ነገሮች ፡- ቁርጥ ውሳኔ፣ ትግበራ እና የሚያጋጥሙ ተግዳሮቶችን መሻገር፣ ወደቀደመ አሰራሮች ላለመመለስ መታገል ያስፈልጋል ብለዋል

በመርሐግብሩ መዝጊያ ላይ አጥቢያ ዶት ኮም የስልጠናውን ቀጣይ ትግበራ የማገዝ እና የመከታተል ስራን የሚሰራ ሲሆን በቀጣይነትም ሌሎች ጉዳዮች ላይ ተመሳሳይ መርሐግብሮች ቀርጾ እንደሚንቀሳቀስ ተገልጿል።

አጥቢያ ዶት ኮም ተተኪ ባለሞያዎችን ለማፍራት እና የአገልግሎቶችን ቀጣይነት ለማረጋገጥ የሚያስችል የማብቂያ መርሐግብር /Incubation Program/ የሙከራ ትግበራ ጀምሯል። በዚህ የሙከራ ትግበራ ተሳታፊዎችን ከሰንበት ት/ቤቶች አንድነት እና ከማኅበረ ቅዱሳን ግቢ ጉባኤያት ማስተባበሪያ በተሰጡ የተሳታፊ ጥቆማዎች መነሻነት ምልመላ የተደረገ ሲሆን መርሐግብሩ ከ3-6 ወራትን የሚፈጅ ይሆናል።

የመርሐግብሩ ተሳታፊዎች በቴክኖሎጂ፣ ተቋማዊ አሰራር እና መፈሳዊ የሞያ አገልግሎት ዙርያ ስልጠናዎችን የሚወስዱ ሲሆን በአጥቢያ ዶት ኮም ልዩ ልዩ ፕሮጀክቶች በመሳተፍ ተግባራዊ ልምምድ እንደሚያደርጉ ታውቋል።